【明報專訊】預算案下周發表，多個黨派要求全民派錢或者消費券，一向反對派錢嘅會計界梁繼昌(Kenneth)、資訊科技界莫乃光(Charles)噚日就改口，認為要處理派錢訴求。 「無能政府唯一可以就係派錢」 Charles早前批評民建聯叫政府派錢，認為只會炒高物資價格。噚日佢話如果政策做得好就唔使派錢，但畀咗好多時間政府，都睇唔到解決物資問題，「差嘅政府、無能嘅政府，唯一可以做到就係派錢」，特別係令基層解決基本生活需要。 Kenneth就話派錢已變成政治議題，雖然對可唔可以刺激經濟有保留，但認為大家既然都唔妥政府，係咪都應該派1萬蚊畀大家消消氣。佢提到，如果財赤超出GDP 5%，信用評級有可能降級，相信派幾多錢要視乎其他紓困措施開支，估最終會派5000、6000蚊左右。
|
| |
| |
