粵曲唱唧唧復唧唧 非華語生贏冠軍
[2019.05.06] 發表
【明報專訊】「唧唧復唧唧，木蘭當戶織……」香港學生對《木蘭辭》 耳熟能詳，不過對非華語學生嚟講，要讀要背唔係咁易。一班伊斯蘭鮑伯濤紀念小學嘅學生付出唔少心機，每日苦讀記低《木蘭辭》每粒字嘅拼音，仲排練基本做手同台步，最終喺舞台上自信地演唱，令在場觀眾無不讚歎，喺查篤撐兒童粵劇協會主辦嘅「第五屆校際兒童粵曲大賽」高小團體組別拎到冠軍。
粵劇係中國藝術瑰寶，喺後生一代承傳好重要。今年兒童粵曲大賽有800名幼稚園及小學生參與，比上年多35%。比賽有60多個學校團隊演出，學生喺台上耍棍及壓一字馬等，功架十足。入圍個人組別嘅參賽者，之後仲有機會踏上西九戲曲中心台板，參與原創兒童粵劇演出。
更多港聞
相關新聞
