李慧琼送蛋糕 預祝EQ生日
[2014.12.20] 發表
【明報專訊】民建聯近日有開心事，繼主席譚耀宗月中生日年滿65歲，另一議員葛珮帆(EQ)12月23日牛一，黨友同埋職員真係有心，李慧琼及職員噚日拎埋蛋糕，提早祝EQ48歲生日快樂。
李慧琼及EQ嘅同事其實都好鬼馬，上星期喺辦事處開幕時，已偷偷搵咗在場所有嘉賓喺生日卡簽名，噚日先至送畀EQ，包括律政司長袁國強及西貢區議會主席吳仕福等。EQ就話，2014年香港太亂太多事，希望2015年每日都係平平安安。
鍾樹根將郭家麒當陳家洛
EQ心情大好，而佢嘅黨友鍾樹根就繼續爆笑料，噚日喺立法會會議辯論青年人向上流議案時，發言指民建聯將反對泛民黃碧雲、郭家麒、李卓人嘅修訂案，認為呢啲修正案「對錯焦、用錯神」。
不過，公民黨梁家傑之後話，樹根今次將郭家麒誤作陳家洛，因為郭家麒沒有提出任何修正案，應該係陳家洛先至啱，但「我們對鍾樹根議員這些錯誤，不感到很意外的」。
更多港聞
【明報專訊】佔領運動令到部分人由原本親建制改為支持泛民，好似民建聯成員潘煒聰，9月初轉軚撐佔中同佔中三子，一齊剃頭明志，仲剪爛埋民建聯會員證...
詳情
相關新聞
