上周六1178架次 航班升降新高
[2014.12.22] 發表
【明報專訊】學校已經放緊聖誕新年長假，網上好多白領一族亦「教路」話，只需申請周一至周三放假，就可以享有9日悠長假期，唔怪得唔少人已經飛咗去外地旅遊。民航處噚日就公布，香港國際機場喺上周六(20日)創咗單日航班升降數目紀錄，共有1178架次航機升降，刷新咗去年3月29日錄得嘅1172航機架次最高紀錄，而與今年每日平均航機1073架次比較，多咗9.8％。
此外，上周六有685航機架次飛越香港飛行情報區，即民航處當日合共處理1863航機架次。機管局預計，聖誕同新年期間，加班機達到205班次，客運同升降量亦會達到高峰。而為慶祝聖誕，上周六至今個星期五，機場首次舉辦燈光表演。
航班升降數目預料會再增加，航空公司增開嘅航班主要前往東北亞及東南亞城市，最熱門目的地係台北，其次係首爾同曼谷。
更多港聞
相關新聞
