收起風筒變聖誕老人 費Sir慈愛 握手乞丐

收起風筒變聖誕老人費Sir慈愛握手乞丐

[2014.12.25] 發表

又到聖誕，在英超做得領隊，預咗冇得休息之餘，仲要壓力大到爆燈，你睇尹戈爾同朗奴高文成日投訴聖誕快車就知。但正所謂無官一身輕，費格遜卸任曼聯領隊後，過住逍遙快活嘅日子，妙語連珠大讚摩連奴不特止，甚至同街上的乞丐亦有講有笑。「費Sir牌風筒」，變咗歷史名詞喇！

見慣費Sir在球場上兇神惡煞，現在變成慈祥的「聖誕老人」真係有啲唔慣。早幾日佢喺曼徹斯特市同三五知己食完晏後，走出餐廳等車時有個坐輪椅的乞丐上前攀談，費Sir同佢傾咗幾句之餘，亦同佢握握手，做個好朋友(右圖，網上圖片)。

原來個乞丐大有來頭，因一腔利物浦口音而被叫做「利哥」，唔知費Sir係咪想安慰下「紅軍」球迷，定係叫佢除咗頂天藍色、曼城味十足嘅帽呢？

讚摩帥靚仔似佐治古尼

至於費Sir的另一面，除咗慈祥，仲有幽默。話說佢一向欣賞車路士主帥摩連奴，多次想邀請對方作為接班人，日前佢接受電視台訪問時，道出佢最欣賞摩帥嘅地方﹕「其實真係好唔公平，佢又靚仔，個髮型又同佐治古尼有得比。」男人間惺惺相惜，估唔到費Sir都愛型男，可能摩帥聽到都會覺毛管戙，不過以下嘅讚美聽落應該好開心﹕「我認為佢最能作為榜樣的，係能講5國語言。佢好有決心成為教練，雖然佢從來冇踢過比賽，但咁又點啫？有幾多老闆夠膽畀個新人執教，偏偏佢就做到喇！」

全隊紅魔乜都好

讚摩連奴讚到咁激動，但費Sir都冇大細超，大讚尹戈爾有料到，「下半季要小心曼聯」，又話「卡域克係英格蘭最好嘅中場，朗尼又踢到曉飛，不過我最滿意嘅都係(門將)迪基亞」，讚美之辭就似聖誕禮物，人人有份啦！