【明報專訊】立法會財委會今日繼續審議成立創科局嘅撥款申請，人民力量陳偉業(大嚿)表明拉布，一向心直口快嘅行會成員羅范椒芬，對創科局十分着緊，前晚就發咗個短訊游說大嚿，話「懇請為創科局放行，不要拖跨(垮)香港」，又話「我愛香港，不忍見它沉淪」，大嚿睇完回贈「有你們管治，香港必定沈(沉)淪」，羅太亦好唔客氣咁，喺噚日朝早近7點回覆一句「剃人頭者，人亦剃之。傷害無辜者，天誅地滅」。 大嚿怒斥：嗰種霸道係好恐怖㗎 噚日朝早羅太喺商台節目《在晴朗的一天出發》力銷創科局，並呼籲拉布議員「要玩喺其他嘢玩」，節目主持中途打電話畀大嚿加入對談，令兩人由文字鬧變成喺節目對鬧，羅太一開口就笑住話大嚿鬧佢，大嚿好唔忿氣話「係邊個鬧邊個先」，仲即刻大爆佢哋嘅短訊對話出嚟，話羅太嗰句天誅地滅「幾狠毒呀」、「狠毒婦人心」。 羅太就讀晒所有短訊內容出嚟，證明自己係苦口婆心同大嚿講，創科局對香港發展嘅重要。羅太解釋，佢所講嘅「傷害無辜者，天誅地滅」，無辜者係指700萬市民。節目中羅太一再想打斷大嚿講嘢，大嚿就鬧羅太「嗰種霸道係好恐怖㗎」，火藥味十足。
|
| |
| |
;){kind=small}
;)
