學協就職禮 詩姐西環撐 會長係之鋒同窗 互指少上堂

學協就職禮詩姐西環撐
會長係之鋒同窗互指少上堂

[2015.03.16] 發表

【明報專訊】香港專上學生聯會(學聯)係大專界知名學生組織，但另一邊廂，被指係親建制嘅香港青年大專學生協會(學協)，今年就諗住大展拳腳。噚日學協舉行第22屆中央幹事會就職典禮，一個學生組織就職典禮竟然可以請到政界重量級人物出席主禮，包括前律政司長梁愛詩、立法會議員謝偉俊，以及中聯辦青年工作部副部長李薊貽等人，仲可以租用灣仔會展舉行。

李佳斌前民記社區主任

唔講唔知，只得21歲嘅學協會長李佳斌曾經係民建聯社區主任，仲咁啱係學民思潮黃之鋒嘅公開大學同班同學。

李佳斌雄心壯志，希望學協可以為大專界同學服務，打響名堂。不過，佢話「唔係話要超越學聯」，但就質疑學聯好少為學生爭取福利，佢舉例指浸會大學往九龍塘港鐵站嘅小巴年年都加價，「點解學聯唔爭取減價，淨係識去示威遊行」。唔知遲啲會唔會見到學協成功爭取小巴減價嘅橫額喺浸大出現呢？

黃之鋒：齊做project無所謂

李佳斌話佢同黃之鋒係同班同學，被問到兩人有無試過喺班上交流政改、社會議題，李佳斌就話無同黃之鋒傾過，因為「唔見佢返學……無機會」。不過，黃之鋒就同Emily講「唔知李佳斌是誰」，佢話問班上其他同學，同學話李佳斌上堂仲少過佢。不過，黃之鋒話如果有機會，大家一齊做group project都無所謂。