卿姐勸勿做校委主席 李國章笑笑口
[2015.11.28] 發表
【明報專訊】特首梁振英(CY)、行會成員同一眾官員噚日齊齊去立法會，同議員午宴。行會成員李國章喺開席前同民主黨主席劉慧卿密密斟，其間卿姐仲大笑。卿姐食完飯後話，有勸李國章唔好做港大校委會主席，但對方笑笑口無回答。卿姐仲話李國章已答應會喺政府宣布港大校委會主席任命後，去佢嘅網台節目《議會內外》做訪問，「無論佢(李國章)做唔做到主席」。
梁班子與議員午宴 高永文又食又拎
環境局長黃錦星同食物及衛生局長高永文都有出席午宴，但席上唔見黃錦星個好拍檔「大嘥鬼」，但雖然「大嘥鬼」唔喺度，高永文都響應唔好浪費食物嘅呼籲，臨走時打包食物，見到記者時仲笑住話，「畀你哋影到我又食又拎𠻹」。
民主派有7個議員出席午宴，包括民主黨劉慧卿、單仲偕、黃碧雲；工黨李卓人同張國柱；衛生服務界李國麟，以及社民連梁國雄(長毛)。
長毛喺午宴開始時，走向主家席向CY示威，批評CY早前喺施政報告諮詢會上趕走佢，同埋仲未落實全民退休保障。長毛向CY遞上一碗飯，意指老人家無飯食，其間有在場嘉賓一度舉杯說「乾杯」。在場近10個保安見狀就好緊張，喺長毛展示晒所有示威物品後，就急急腳將長毛帶離場。
更多港聞
【明報專訊】醫管局主席梁智仁噚日獲政府再度委任，做多兩年，下月1日起生效。梁智仁話，兩年前上任時適逢政府全面檢討醫管局運作，而兩年後醫管局其...
詳情
相關新聞
