【明報專訊】特首梁振英(CY)早前喺《施政報告》中就提到喺中環、青衣等地設立釣魚區，原意無壞，不過佢噚日嘅一番話就被批評「離地」——佢喺網誌話，一直希望喺中環商業中心區，用好海港嘅休閒用途，認為中環上班族中午食個簡單午餐，剩低45分鐘坐喺岸邊釣魚，係好好嘅鬆弛辦法，「有釣魚會的朋友說：可以在中環釣魚，喜出望外」。佢仲話，若將來可以喺IFC一帶建設現代化岸邊泳棚，「午飯後游20分鐘，是去gym以外的好選擇」。 CY話自己去年只釣過3次魚，期待釣魚區建成後，以呢個「新方式」享受美麗海港。不過，噚日社會上唔少人關注學生自殺問題，而CY大談休閒垂釣，就被人話好似唔係好應景。而喺中環游水嘅建議亦辣着唔少打工仔，有人呻，得1個鐘食飯時間，排隊食飯都唔夠啦。Emily就睇過康文署游泳人士手冊安全指引，上面話，游泳人士飽餐後切勿立即游泳，游泳前須熱身，似乎要用午飯時間游水真係有啲難喎。Emily睇番資料，其實CY喺2012年尾已提出呢個諗法，當年佢主持渡海泳，有感而發，話「在維港兩岸興建人工泳棚，讓大家，包括中環和尖沙嘴的上班族可以在海中紓減工作壓力，或者在岸邊釣魚，why not？」
|
| |
| |
;){kind=small}
;){kind=small}
;)
