【明報專訊】特首梁振英(CY)上年開始玩facebook，但一直唔肯加普通網民做朋友，搞到網民未能同佢互動，直至fb新增表情符號，網民就喺CY嘅fb度不斷用「嬲嬲」表情回應。特首辦噚日回覆立法會議員嘅提問時，就話CY嘗試用fb同市民分享生活同工作體會，「現仍處於探索階段」，帳戶係由特首辦負責管理同更新。 特首辦話，網民可向特首fb提出交友或加入群組邀請，而特首認識嘅人或佢哋推薦嘅朋友所提出邀請會獲接納喎。但特首辦就話，無就CY嘅fb朋友年齡、所屬地區同性別分析，亦無統計fb收到嘅表情符號數量，或為讚好、回應、分享訂立指標。 外界盛傳CY嘅fb主要由新聞統籌專員馮煒光負責，大家又知唔知佢年薪有幾多呀？馮煒光於2013年12月16日上任，今年將約滿，若佢可續約，2016/17年度連同約滿酬金就有383萬元，較特首辦主任邱騰華同年度嘅薪酬360萬元仲要多。2014/15年度馮煒光嘅年薪為274萬元，2015/16年度就有296萬元，即多咗22萬元。 CY 任內放假51日 唔少人都覺得CY成日放假，亦有議員問到有關問題，特首辦就回覆話，CY喺2012年7月上任至今年2月底，總共放咗13次共51日假。前特首董建華在任約8年期間就放咗25次共59.5日假，即係話CY任期至今，放假方面幾乎已追上董伯伯喇。至於前特首曾蔭權，約7年任期就放咗48次共89.5日假。
|
| |
| |
;)
