李國章讚CY 「最用力推動房屋土地特首」
[2016.10.29] 發表
【明報專訊】特首選舉前哨戰展開，被視為「梁粉」嘅行政會議成員李國章噚日話，自己「諗都無諗過」選特首，又覺得𠵱家特首由北京委任，有班人「點都會同佢作對」，就算「搵德蘭修女嚟」都無補於事，仲反問「現屆政府有邊個政策唔好？」佢大讚特首梁振英(CY)「係咁多年來，最用力推動房屋土地嘅特首」咁話。
李國章一連幾日接受立法會前主席曾鈺成喺商台節目《鈺成千里目》嘅訪問。被問到點睇社會亂局，李國章覺得「局面好難扭轉」，但相信大部分人都仍然覺得香港係福地、認為「一國兩制」對香港有利。咁點解激進派有市場？佢就話「因為班小朋友覺得好睇嘛」，「兩個人打交喎，個個都會停低睇吓，實吸引到人㗎」；又話傳媒「唔係衰嘢唔報」，搞到社會難以凝聚，反問「新加坡會唔會咁？泰國會唔會咁？」
入下屆班子？ 「睇老細係邊個」
李國章又覺得現屆政府「個個政策都係好」，認為外界批評政府、批評CY要有理由。如果收到邀請，會唔會加入下屆政府班子？李國章就話「要睇吓老細係邊個先」。
更多港聞
【明報專訊】立法會選舉喺上月完結，無論係落選定當選者都要喺下月8日或之前，向選舉事務處填妥有關選舉經費、選舉捐贈等嘅利益申報。Emily噚日...
詳情
【明報專訊】香港人習慣一有假期就出遊，去嘅地方愈嚟愈多選擇。入境處噚日就宣布，持特區護照嘅話，又多一個國家給予免簽證或落地簽證待遇，就係非洲...
詳情
相關新聞
