【明報專訊】唔少熟食小販會趁農曆新年喺街頭擺檔做生意，有人歡迎，但亦引起衛生同安全問題，舊年更發生多宗衝突。身兼立法會墟市事宜小組委員會委員嘅民建聯何俊賢，早前同黨友鄭泳舜落深水埗巡區，佢哋噚日上載短片，批評「桂林夜市」引起問題，同時為深水埗區議會月底喺楓樹街舉行嘅新春墟市宣傳，透露到時會有嘉年華同熟食攤位。 桂林夜市係舊年其中一個衝突點，無黨派議員劉小麗當時有擺檔，佢當選入咗立法會後，不時同何俊賢就墟市問題針鋒相對。鄭泳舜話，其實楓樹街墟市舊年都有搞，今年希望引入更多深水埗特色，佢亦好似意有所指，話農曆新年最緊要大家過得開心。鄭泳舜上月都介紹過墟市，話到時會有隔音設施，並喺舞台設置天幕，減低對附近居民影響。唔知桂林夜市同楓樹街墟市打對台，市民會選擇去邊個呢？
|
| |
| |
;){kind=small}
;)
