【明報專訊】形象工程對特首選戰舉足輕重，特首候選人曾俊華同林鄭月娥噚日先後出席「港區婦聯代表聯誼會」交流會，就分別賣幽默同溫情，爭取市民支持。曾俊華入閘後，有言論批評佢係「泛民代理人」，甚至指控佢同「外部勢力」有關；有記者噚日喺會後問曾俊華，有人將佢同「外部勢力」扣上關係，去咗旺角出席活動嘅佢就輕輕一笑，然後話：「外部勢力呀？哈哈，我住港島喎！」 與外部勢力有關？ 曾：我住港島喎 至於林太喺會上就同約200名婦女，分享同亡母相處嘅往事。林太話，自己最尊敬嘅女士就係媽媽，媽媽雖然無受教育，但知道教育對子女嘅重要性，而自己「讀到書」，媽媽就幫佢報考英文天主教小學。林太話，媽媽當年帶佢去報考小學之後，就請食雲吞麵，而當時請食雲吞麵已經係好大獎勵，所以至今仍然歷歷在目。 林鄭憶亡母籲關心至親 林太之後感觸咁話，對媽媽嘅最大歉疚，就係自己工作太繁忙、陪伴媽媽嘅時間好少，媽媽離世前幾年，兩個人好多時都係喺醫院傾偈，但當媽媽病好，「我又掛住做嘢，少咗關心佢」，寄語與會者關心仍然在世嘅父母。
|
| |
| |
;)
