【明報專訊】喺前晚電子傳媒舉辦嘅特首選舉論壇上，候選人林鄭月娥大讚對手曾俊華嘅前政治助理羅永聰「非常叻」，更公開「挖角」，話如果自己當選，不如搵阿聰加入團隊。阿聰噚日就立即現身為「阿sir」(曾俊華)打氣，仲透露阿sir喺宣布參選嘅造勢大會當日，睇網上留言時喊咗出嚟。 話「老闆」接納意見 有心變革 曾俊華嘅facebook噚日上載《羅永聰 X 曾俊華 拍住上》短片，阿聰用「阿sir」稱呼曾俊華，讚薯片願意接受意見，所以喺準備選舉論壇時，阿sir係「任鬧唔嬲」。 阿聰話，阿sir係接納意見嘅「老闆」，係一個有心要變革嘅人，但阿sir亦明白變革要耐性、時間，否則只會失敗。 阿聰話，選舉過程中令曾俊華最開心嘅，係感受到市民嘅支持及認同。阿聰憶述，喺準備宣布參選當日，佢畀咗個電話阿sir睇，曾俊華自己坐埋一角睇網民留言，「揸住個電話一路掃一路掃，掃吓掃吓，(曾俊華)就喊咗出嚟」，阿聰話呢一幕反映咗曾俊華感受到香港人對佢有好大期望，以及當中嘅溫暖。 片段最後仲有「彩蛋」，被問3月26日選舉後會做咩？阿聰話：「佢(曾俊華)當選吖嘛你講緊，佢當選，咁梗係我要繼續幫佢啦。」
|
| |
| |
;){kind=small}
;)
