前兩次遇雪崩地震 三征珠峰 曾燕紅老師擬攻頂
[2017.04.14] 發表
【明報專訊】因雪崩同地震、兩次無法攻上珠峰頂嘅中學教師曾燕紅(Ada)，近排又去咗尼泊爾首都加德滿都準備攻頂，佢妹妹Alice同Emily講，只要天氣良好，達陣機會非常高，希望Ada今次成功！
Alice話，Ada舊年10月向學校請辭之後就積極備戰，佢尤其鍾意喺冬天好凍嗰幾日，著好少衫就去通宵跑山，等自己預備一下攻頂個陣會面對嘅極端嚴寒天氣。Alice話，Ada一向都好fit，之前兩次攻頂失敗都係因為天災，所以今次可以睇準天氣穩定再出發。
每年嘅5月都係登峰時機，因為比較少颳大風或落暴雪。Alice話，Ada未到5月都唔會攻頂，家陣仲喺加德滿都城市，訓練多一陣就會登上珠峰大本營，然後喺大本營準備同留意住天氣狀况，一到合適時機就起程。
大家唔好以為大本營好易去，珠峰嘅大本營位喺海拔5000米，由山腳至大山營，建議用一個星期行，不過Ada試過用一至兩日就上到去，到達之後有頭痛徵狀，所以今次都係慢慢行，務求以最佳狀態攻頂。
更多港聞
【明報專訊】唔少香港人都鍾意去旅行，根據舊年公共圖書館嘅借書紀錄，最多人借閱嘅10本成人中文非小說類書籍裏面，第一名係《香港中學文憑試．中國...
詳情
相關新聞
