【明報專訊】噚日民政事務局長劉江華同該局前副局長許曉暉，一齊出席「全球水墨畫大展」開幕典禮做嘉賓，劉江華話個展覽由許曉暉一手「湊大」，仲大讚許曉暉非常努力推廣文化，喺呢方面亦有成就。 劉江華帶埋新上任嘅政治助理黎穎瑜(Jade)畀大家認識，佢話阿Jade以前有涉獵文化界，對民政嘅工作非常有幫助。 阿Jade啱啱上任，佢話已經接觸咗18區嘅地區專員、助理專員，又同20個地方代表、領導見面，亦同已經履新嘅幾個政助交流意見。新官上任真係好忙碌，阿Jade話之後就會見議員、區議員，了解地區情形。 今年有副局長同政助都係輸咗選舉後加入新班子，有人形容係「敗部復活」，劉江華就再被問到「其實你自己加入都有呢個經驗」，點睇「敗部復活」呢種評語？佢回應話，無論過往嘅經驗或者經歷，無論係選舉嘅經驗，喺專業範疇嘅工作，甚至喺政府中工作，其實都係一種磨練。 劉江華喺2012年嘅立法會選舉中落敗，同年就加入政府任政制及內地事務局副局長，之後喺2015年擔任民政事務局長至今。
|
| |
| |
;)
