【明報專訊】近年立法會財委會主席陳健波主持會議時「勞心勞力」，每逢遇上具爭議嘅議題，仲要食雙倍血壓藥先去開會，避免被激親。波哥接受電台節目訪問時，就透露完成今屆任期之後唔會再做議員，「我喺議會都做咗咁多年，想盡快去全世界未去過嘅地方」。 波哥噚日仲同Emily講，更重要嘅係「沒有連任壓力，才能放心盡力，憑良心做事，比較快樂」。 波哥接受港台節目《舊日的足跡》訪問時，大呼好彩喺接任財委會主席前，已經做咗通波仔手術，咁先可以避免開會時因為被人屈而爆血管、被激死。 波哥話，做議員最難唔係工作壓力，而是有冤屈，特別係一啲議員屈佢有利益衝突、被人攻擊時，就會「火燒心」，「我後來明白了，佢哋係要令我亂、出錯，咁先可以踢我走」。 笑言選直選「有機會當選」 被問到下屆立法會選舉會唔會轉戰地區直選，63歲嘅波哥笑言自己做實事受市民支持，去選直選「係有機會(當選)」，不過佢話喺議會多年，做埋今屆任期就足足服務市民12年，已經「夠啦」，希望趁仲有「黃金十年」，可以快啲去環遊世界。
|
| |
| |
;)
