【明報專訊】建制陪參觀 開心集郵 中聯辦主任王志民噚日應邀去立法會同議員午宴，好多議員食完飯後都笑晒口，似乎午宴氣氛真係好輕鬆愉快。立法會主席梁君彥喺飯後陪同王志民參觀會議廳，一眾建制派立法會議員亦齊齊陪王參觀，大家仲開心大合照，不過，民主派議員就無加入參觀大隊，食完飯就走咗喇。咁嘅安排，同5年前嘅時任主任張曉明到訪相若。 噚日嘅午宴菜式簡單，包括頭盤「淮揚三秀(香醋青瓜、五香牛展(腱)、櫻花蝦萵筍)」、牛肝菌燉竹絲雞湯，4個主菜「碧玉伴金蝦」、「魚躍龍門」、「喜鳳朝陽」、瑤柱鮑汁荷葉飯，仲有甜品「紅蓮喜相圓」同果盤。 民主派有幾個議員出席午宴，其中民主黨黃碧雲喺王志民致辭尾聲時，大聲高呼「爭取真普選」嘅口號，呢句口號無損氣氛，因為轉個頭大家就互相敬酒開餐。 王志民亦趁噚日係世界閱讀日，向議員送上兩本書，分別係《憲法和基本法合訂本》同《鄧小平論香港問題》。中聯辦未來有機會回請議員去西環，如果成事，唔知立法會又會送咩畀中聯辦呢？
|
| |
| |
;){kind=small}
;){kind=small}
;)
