【Emily】曾籲罷工醫護守崗位 林哲玄參選醫學界
[2020.07.27] 發表
【明報專訊】醫學會前副會長林哲玄今日會報名參選立法會醫學界功能組別，挑戰爭取連任嘅陳沛然。年初有醫護罷工，要求政府全面封關，林哲玄就呼籲佢哋緊守崗位。被問到會唔會擔心喺罷工問題同前線睇法唔一樣而影響選情，佢話唔可以因為選票就改變睇法，要堅持初衷。
林哲玄同Emily講，想搵個新平台繼續服務業界，所以決定參選，仲話好多醫生打電話畀佢以示支持。被外界形為「黃藍之爭」嘅醫學會選舉早排結束，林哲玄競逐連任失敗，佢話醫學會同立法會兩個選舉嘅着眼點唔同，如果攞嚟比較，未必合適。
至於政府應付疫情嘅表現，佢話有好多嘢都做得唔好，如果唔係都唔會有第三波疫情，認為當局防疫措施要「快手啲」。不過，佢話唔可以樣樣賴晒政府，抗疫要全社會一齊做先得。睇番資料，林哲玄都做過唔少關於醫療嘅公職，包括自願醫保諮詢小組，以及日間醫療機構標準項目督導委員會嘅成員。喺2016年醫學會選舉，林哲玄仲成為「票王」㖭。
更多港聞
【Emily】與屈穎妍雷鼎鳴出新書？ 資深傳媒人施嘉雯呼冤「被作者」
【明報專訊】唔少人都會趁書展出新書，明報出版社今年其中一本新書名為《香港顏色密碼》（圖），一眾作者包括作家屈穎妍、前新聞統籌專員馮煒光、香港... 詳情
相關新聞
