【Emily】澳門工展會試用吸塵機 丘應樺話包辦家務
[2023.04.08] 發表
【明報專訊】香港同澳門全面通關後，廠商會今年再次去澳門搞工展會，一連4日嘅活動噚日開幕，商務及經濟發展局長丘應樺都有「過大海」主禮，仲即場試用展品。同樣獲邀出席嘅新民黨立法會議員容海恩話，丘應樺(圖右二，商經局fb圖片)去到家電攤檔，一手拎起新款吸塵機試用，仲話屋企啲家務都係佢一手包辦。
丘應樺致辭時話，澳門舉辦嘅工展會過往曾錄得超過10萬人次入場，今屆有超過260個攤位參展，希望復辦後可推動兩地商貿交流。廠商會預計可吸引超過15萬人次入場。
廠商會一行30人代表團噚日亦獲澳門特首賀一誠接見，就點樣深化港澳經貿合作、共同推進大灣區發展等議題交流。廠商會話賀一誠介紹咗當地新四大產業，包括現代金融、大健康、會展商貿、文化體育，而澳門政府正積極對外宣傳橫琴嘅優勢，期望同廠商會加強合作。
更多港聞
相關新聞
