解鎖死前完成清單
楊潮凱紐西蘭跳傘克服畏高
大膽一嘗Sky Dive，為自己人生寫下其中一個bucket list(死前要完成清單)。
雖然只有數分鐘的體驗，但已令楊潮凱領悟不一樣的人生體會，「開頭真的很驚，但跳落去後就很enjoy。原來好多時候，只是被自己的恐懼去嚇怕自己，不敢去做，但當你真正實行的時候，原來沒有想像中恐懼！人生苦短，想做就快做啦！」
撰文：王崇頴 圖片提供：楊潮凱
Sky Dive
「疫情期間，有一晚我瞓唔着，我喺度諗，假如自己明天不在人世，到底有咩想做？就係嗰一晚，我為自己人生寫咗一個bucket list！今個旅程我就實行咗其中一項Sky Dive(跳傘)，對於畏高的人嚟講，簡直是人生最大挑戰，但我又真係好想挑戰自己，好想克服心魔，所以我同我自己講：『楊潮凱，如果你夠膽喺15,000呎高空跳落去，我相信之後你沒什麼事做不到！』我就是保持住這份信念，當飛機打開機門的一刻，給自己透一大啖氣，一躍而下！」
Waitomo Glow Worm Caves
在Waitomo(紐西蘭北島Waikato區)必到的地方，洞穴中的藍色銀河，數千隻螢火蟲亮起，讓你感覺彷彿置身於天文館中，凝視夜空中數千顆星星，場景壯觀。
「我哋參加了兩個tour，一個在Waitomo Cave(懷托摩洞穴)，坐着小船在地下洞穴漆黑一片的環境中，頭上一大片星海，感受當中的寧靜，不得不讚嘆大自然的鬼斧神工；第二個tour在Ruakuri Cave(魯阿庫利洞)，洞穴過程要自己行，大概一個半小時，最令我驚訝是女兒Catharine BB全程好留心聽導遊講解同全程自己行，行完表示蟲蟲啲光好靚呀！聽到真係好感動呀！」
Camper Van
「除咗玩直升機之外，今個旅程最開心就是Camper Van(露營車)度過一晚，夜晚望住一片星河食晚餐，特別有一番風味。未揸過大車嘅我，一直以為泊車的時候比較困難，但原來又冇我想像中難。最緊要出發前，申請返個國際牌，去到就可以揸，勁正！最開心絕對係Catharine BB，第一次瞓露營車，佢好興奮，所有事物都好新鮮，成日都話想再去多次。」
Lake Tekapo
「由Queenstown出發，揸了大約三小時車程去到Lake Tekapo(特卡波湖)，探訪世界七大星空保護區嘅壯觀無光害銀河。參加了當地一個dark sky project的tour，去到郊外地區觀星，全程都有領隊講解歷史及文化，講解唔同星星位置，南十字星及老人星，以及呢個地方嘅人，如何有效保持呢個地方嘅低光害環境。我好欣賞呢個地方嘅人，用心竭力去保護這片星空留給下一代人。在這個地方，最厲害的是，你只需閉上雙眼十秒，抬頭一望就可以看到銀河，真係靚得好誇張！」?
Queenstown
「如果想一睹Queenstown(皇后鎮)的全景，除了坐直升機外，仲可以坐Skyline Gondola(空中觀光纜車)，其實有少少似香港坐山頂纜車上凌霄閣，上到頂，向下望個風景真係一流，面對靚雪山景再食buffet，絕對十分享受。」
