【Emily】報章提「米線阿姐式」口音 洪雯話唔尊重基層勞動者
[2025.06.18] 發表
【明報專訊】今屆立法會唔少議員有「港漂」背景，喺會議都盡力用廣東話發言，不過難免帶有口音。《星島日報》噚日報道話立法會人工智能(AI)謄錄系統「智識聽」將會推出實時字幕，可識別「半鹹淡」口音或用錯字情况；報道用到「『米線阿姐式』口音」嘅字眼，引起「港漂」選委界議員洪雯不滿，批評報道講法「很不尊重基層勞動者」。
立會AI謄錄 用洪雯發音訓練
《星島》報道提到，科大訊飛董事長劉慶峰喺唔同場合都推介智識聽，話就算極唔標準嘅廣東話，系統都可以識別，劉仲以洪雯做例子。洪雯亦同《星島》講，立法會AI系統以佢嘅發音做素材，訓練識別廣東話功能。
報道最後一段話，無論「『米線阿姐式』口音，抑或『明張目膽』用錯成語被修正」，實時字幕都有助公眾理解會議內容，就引起洪雯不滿。佢噚日喺社交媒體發聲明，特別圈出呢一段，話佢作為議員，有心理準備被「無聊人」嘲笑口音，但《星島》作為「本港大報」幾次用咁嘅說法「讓我很遺憾」，亦唔尊重基層勞動者。洪雯話，「米線阿姐」不願躺平等福利、自食其力，值得尊敬，反問「沒有了米線阿姐那樣的人，香港如何運轉？」
更多港聞
【Emily】民主思路籌款晚宴 李家超話聞異則喜
【明報專訊】2015年成立嘅民主思路噚日舉行「10年見證」經濟論壇暨籌款晚宴，特首李家超（圖一前左）同民主思路召集人湯家驊（圖一前右）等互相... 詳情
【Emily】銀髮經濟發展聯盟成立 管牧：見我頭髮都知受惠
【明報專訊】政府近期力推銀髮經濟，民建聯同政商學界亦成立「銀髮經濟發展聯盟」。聯盟成員之一嘅立法會議員管浩鳴噚日出席聯盟啟動儀式同圓桌會議時... 詳情
中學生研開藥AI奪獎 惹非原創質疑 網站先稱助製後謂優化 數字辦：全面調查
【明報專訊】由中學生研發、以病人資料透過人工智能（AI）交叉檢查醫生藥物處方的網頁平台「藥倍安心（Medisafe）」獲多個創科獎項，包括政... 詳情相關新聞
