BIG FOUR難忘「槍戰」大鬧古裝街遭高層「照肺」
[2025.06.25] 發表
【明報專訊】張衛健、許志安、蘇永康和梁漢文組成的BIG FOUR於8月9至11日假紅館舉行3場演唱會，4人相隔13年推出新歌《赤子們》。BIG FOUR聚首拍MV勾起不少難忘回憶，張衛健大爆1990年代在清水灣電視城的百厭事，他們玩「槍戰」大鬧古裝街，「有人當自己係隊長，揸住支槍去到教堂嗰度『轟』一聲，真係打爆咗塊玻璃，再隊支槍出去話『一齊嚟！』」
兩日後張衛健被無綫高層曾勵珍(珍姐)召見，「珍姐問我係咪玩到冇嘢好玩？係咪好掛住返嚟古裝街開工？打爛教堂塊玻璃要賠𠻹」。許志安補充說：「成條古裝街地下都係BB彈。」張衛健笑說：「我哋試過『走鬼』，因為有保安聽到聲。」梁漢文稱保安車到場開大燈照住他們說：「你哋好出嚟喇，跟住張衛健匿埋喺車底。」
問到4人最不想BIG FOUR做什麼活動？許志安表示謝絕與3兄弟一齊影貼紙相，「有啲尷尬，4個男人走入去個框框影相」。話口未完，蘇永康踢爆BIG FOUR曾於日本影貼紙相，「1990年代有次我們去日本，嗰時有啲影相機，我哋4個迫入去影過一次，但張相冇咗」。張衛健和梁漢文點頭表示有印象，後者隨即再分享影貼紙相趣事，「嗰時喺香港世貿有一層全部都影貼紙相，我好明顯被迫㗎啦。嗰時快快手影完，又唔識睇啲日文，upload咗幅相上去，又唔知點搞，嚇到我即刻走」。
娛樂組
更多影視
【娛樂場】盧鎮業伙三地新世代演員 穿梭香港拍亞洲電影大獎宣傳片
【明報專訊】《年少日記》盧鎮業（小野）、日本電影《Drive My Car》岡田將生（Okada Masaki）、台片《關於我和鬼變成家人的... 詳情
湯告魯斯撐畢彼特《F1電影》首映 曾合演《吸血迷情》相隔31年重聚
【明報專訊】湯告魯斯（Tom Cruise）曾伙拍畢彼特（Brad Pitt）演出《吸血迷情》，後者主演新片《F1電影》前日在倫敦舉行歐洲首... 詳情
相關新聞
