【Emily】港鐵「超前」講打風安排 田北辰話收貨
[2025.07.21] 發表
【明報專訊】噚日颱風韋帕襲港，港鐵因應天文台喺日間掛9號、10號風球，宣布露天段列車暫停運作；喺前晚凌晨仲加開機場快線班次，由機場開往香港站接送乘客。今次港鐵嘅安排，連不時批評港鐵嘅實政圓桌立法會議員田北辰都話「值得一讚」，話今次港鐵一早喺上星期五已經講露天段列車往返安排，形容港鐵表現「今次收貨喇」。
港鐵話有準備乾糧畀市民
適逢噚日星期日，唔少打工仔放假，田北辰就話由清晨開始做咗個「半日報告」，形容最初天文台掛完8號風球後幾個鐘，「少少風都冇、雨勢都唔大」，以為政府會同上次一樣「狼來了」，點知清晨時分就勁大風同大雨；佢又讚天文台預早90分鐘預告改掛9號風球，比佢喺立法會公開要求多咗一倍時間，對天文台「刮目相看」。
港鐵喺facebook上就話，即使部分列車服務暫停，各個車站都繼續維持開放，畀有需要嘅乘客停留休息，職員亦準備埋乾糧畀市民，並有流動裝置充電站方便市民同屋企人保持聯繫。
更多港聞
【Emily】推建造業STEAM教材 甯漢豪：1橋學5元素
【明報專訊】政府近年鼓勵學校力谷STEAM（科學、科技、工程、藝術和數學）教育，發展局最近就推展「STEAM UP 想建理」項目，為中小學製... 詳情相關新聞
