【Emily】新光黃埔今開幕 播《教父》《烈火青春》 票價劃一80蚊
[2025.08.16] 發表
【明報專訊】「新光黃埔」戲院今日開幕，4間影院共1200個座位，引入6個戲種嘅影院，迎合老中青三代觀眾嘅需要。根據官網，開幕首3日上映多部經典電影，例如荷李活經典《教父》、已故巨星張國榮主演嘅新浪潮作品《烈火青春》等，亦有正上映嘅首輪影片、日本人氣動畫劇場版《鬼滅之刃無限城篇》，另有粵劇《秦王孟姜》等，票價劃一80蚊。
6個戲種影院分別係首輪影院、經典懷舊影院、以被低估嘅電影為主題嘅黃金猛片影院、夜場嘅嘩鬼影院、粵劇影院同動畫影院。「新光黃埔」由風水師李居明投資，佢話期望延續今年3月結業「新光戲院」嘅藝術精神，為香港注入文化活力。
另外，由國際娛樂公司Live Nation營運嘅全新表演場地TIDES預料今年第四季開幕，和記地產集團市場及租務助理總經理何麗明預計「新光黃埔」及TIDES可帶動黃埔一帶商場下半年整體人流升兩三成。
更多港聞
相關新聞
