【Emily】西貢立抗戰碑 紀念港九大隊殲敵
[2025.09.01] 發表
【明報專訊】今年係抗日戰爭勝利80周年，北京本周三(3日)有大型閱兵儀式，而特區政府就響應，近期辦大量活動配合主題，公務員都要參與學習國情活動。政務司長陳國基、民青局長麥美娟等人噚日去咗西貢北官坑村七聖古廟，出席抗戰紀念碑揭幕禮。官坑七聖古廟位於西貢北十四鄉官坑村，陳國基話當年香港淪陷期間，日軍將呢度作為控制九龍市區嘅重要據點，駐守咗20多名日軍到處拉人去挖戰壕、搶掠財物、調戲婦女，話民眾恨之入骨，而喺1944年冬天，港九大隊西貢中隊游擊隊員喺一深夜發動襲擊，喺激烈戰鬥後殲滅現場日軍，但有隊員壯烈犧牲。陳國基話呢個抗戰遺址係烽火歲月嘅重要見證。
陳國基話，藉抗戰勝利80周年呢個時刻，政府相關部門已喺不同遺址做修繕、優化工作，並喺可行地點設紀念牌匾或資訊牌，介紹抗戰歷史。
更多港聞
相關新聞
