【明報專訊】高調支持反佔中組織「幫港出聲」嘅科大經濟系教授雷鼎鳴，噚日幫反佔中簽名運動護航，喺facebook同幾個舊生辯論。事緣一名科大舊生分享咗一篇報道話英皇金融被指要員工簽名反佔中，叫雷教授回應吓。雷就喺fb話篇報道老作，根本無咁嘅可能，佢話所有人都要親身去街站畀義工核實身分證，如果唔係，啲簽名會唔計數。雷教授仲話對嗰位舊生好失望，話佢已經唔記得咗大學所學，下判斷前要客觀考慮所有證據。 指學生要考慮所有證據 Emily問過搞簽名運動嘅「保普選反佔中大聯盟」，佢哋話市民唔一定要去街站都可以簽名，獲授權嘅機構都會幫手收集簽名。 Emily亦搵咗雷教授，問佢點解咁好火同舊生理論，佢就話有私人企業幫手派簽名紙無任歡迎，仲話公司唔會逼員工簽名。佢話自己雖然係半公眾人物，但佢啲留言對象唔係公開，覺得Emily咁報道唔係好啱喎。Emily睇番嗰位舊生facebook私隱set咗公開，唯有叫雷教授下次留言小心啲。
|
| |
| |
;)
