政改宣傳 高官暫停落區
[2015.05.05] 發表
【明報專訊】政改方案公布後，問責官員輪流落區低調派單張，近日都出現唔少令官員尷尬嘅場面，噚日就再無官員落區，官方facebook亦無上載相關相片。Emily聽聞，原本3個建制政團民建聯、工聯會同經民聯，都已經預咗要陪唔同局長去到葵青、油尖旺等區宣傳政改，但就收到通知取消咗；唔通政府擔心再發生類似食物及衛生局長高永文向市民「爆seed」嘅尷尬場面，於是取消晒所有落區活動？
政府中人同Emily講，唔落區絕對唔關高永文事，就算有無當日場面，其實官員宣傳政改都成兩個星期，點都要做檢討，檢視最近形勢，包括外界反應呀咁，再度吓跟住點宣傳，因為政改始終係持久戰，總唔能夠官員派單張派到去政改表決一刻㗎嘛！
不過，一連兩日都有官員、行會成員被市民問到口啞啞，難免令人覺得官員唔落區同尷尬場面有關。政府中人就話，其實呢類事件官員落區前已經預計到，所以絕對唔關事，亦唔係噚日先突然決定唔落區。
雖然近日官員同政黨行孖咇咁落區被指係為政黨造勢、宣傳，但有政黨成員話都好高興暫時唔使再幫手，始終陪人做騷都唔係咁好做！
更多港聞
【明報專訊】不獲續牌嘅亞視會唔會執定幾時賣得出一直未有聲氣，亞視新聞部副採訪主任陳國揚話，唔可以一路頂落去，近兩星期再有十幾人諗住走，真係唔...
詳情
【明報專訊】現時大家拎住手機可以隨時隨地煲劇睇片，唔使坐喺電視機前，但尼爾森調查就話，逾90%受訪家庭仍選擇實時收看電視節目。不過，80後消...
詳情
相關新聞
