【明報專訊】今年香港消費零售市况轉差，為咗刺激消費，中華總商會舉辦「開心消費慶回歸」活動，月尾聯同70幾間商戶、共超過1500間分店提供多項折扣優惠，但今年食肆優惠中，好似無咗1蚊點心，要叫38蚊嘅優惠粉麵，至可以有1蚊碟菜。 本港4月零售業銷貨額比去年同月跌2.2%，自由行消費力又下降咗，零售界趁回歸推優惠。「開心消費慶回歸」活動6月25號到7月3號一連9日舉行，由珠寶首飾、化妝品到食肆都有，折扣逾100項，包括裕華國貨嘅冬蟲草買4両送1両，其董事總經理余鵬春話想大家喺爭執過後潤一潤喎；喺太子珠寶鐘錶買珠寶有八折；莎莎買指定化妝護膚品牌滿200蚊有八五折；零食物語買滿100蚊正價貨品都有八折。 花旗參1蚊1両 至於1蚊優惠，今年有參茸行百成堂推出1蚊両北美洲花旗參片，原價成50蚊両，不過每日限售100両，每人每日只限買1両，而且要去指定分店。 舊年有食肆推出「1蚊點心」優惠大受歡迎；今年稻香集團就推出38蚊粉麵優惠，另加1蚊可以多碟白焯時蔬。
|
| |
| |
;)
