【明報專訊】好多打工仔開工都會偷偷地玩吓WhatsApp，就連一班立法會議員都用WhatsApp溝通。不過喺懲教院所做嘢嘅懲教人員就無咁自由，因為手提電話屬於《監獄條例》下嘅違禁品，阿sir開工前都要鎖起唔畀用。咁戴Apple Watch入監獄開工呢？Emily都聽聞唔得，因為有拍攝同通訊功能。 本港囚犯因為保安問題無得上網，不過Emily就聽聞懲教署研究緊設立一個類似內聯網嘅電子平台，畀有志進修嘅囚犯下載一啲教學材料學習進修。 赤柱監獄都收咗唔少犯人，例如「風水師」陳振聰、前政務司長許仕仁同新地前聯席主席郭炳江等。Emily聽聞佢哋各自都由特別組看管，喺同一座大樓內各自單獨囚禁，每日得一個鐘時間「放風」。據悉為咗鼓勵佢哋群體生活，有時都會安排某啲單獨囚禁犯人一齊放風。唔知陳生、許生同郭生如果見面會有乜嘢偈傾呢？
|
| |
| |
;)
