名人校友「走音」 網民dislike 浸大急抽起校慶短片
[2015.10.30] 發表
【明報專訊】浸會大學(BU)為宣傳出年60周年校慶《我們都是浸大的》校友匯演，搵嚟班校友拍宣傳片，齊齊高唱校歌。宣傳片有多個BU知名校友亮相，包括前主播周嘉儀、呂秉權；電台節目主持「朱薰」吳佩賢等，可謂星光熠熠，不過似乎網民dislike多過like。
有網民話BU校歌歌詞本身就唔太啱音，加埋電子音樂同眾校友嘅歌喉，效果非常「獨特」，又話「浸大肯定冇音樂系」，短片應該改名做「我們都是嚇大的」。唔知係咪反應太熱烈，超出預期，BU噚日突然將影片設咗做「私人影片」。
呂秉權：壞印象好過無印象
BU校友事務處畀參與演出校友嘅電郵就話，感謝佢哋即使唔專業，仍然落力演出。
BU發言人話，《我們都是浸大的》原意係利用較輕鬆手法，帶出活動凝聚校友嘅信息，大學收到校友唔同意見後，已經喺網上平台暫時抽起短片；校友活動籌委會研究緊製作新短片。
有份參與演出嘅呂秉權就話佢參與唔多，對於短片被抽起無咩感覺，但認為有壞印象好過無印象，尊重校方決定。
雖然原裝正版嘅宣傳片設定咗做「私人影片」，但有網民惡搞短片，上載叫做「『我們都是浸大的』正確歌詞版」影片，以音譯BU校歌歌詞，如「長命鶴率」(昌明學術)、「西街新發果芒」(世界新發光芒)。
更多港聞
【明報專訊】東華三院星期日（11月1日）會舉行「145周年文武二帝出巡．文武廟秋祭典禮」，恭請文武二帝乘坐鑾興出巡，替市民祈福消災。
...
詳情
【明報專訊】海洋公園下星期一開始就有免費Wi-Fi喇，噚日官方宣布同香港寬頻推出首階段服務，覆蓋園內12個設施同景點，仲要係公眾Wi-Fi之...
詳情
相關新聞
