任期4個月 張建宗陳茂波搬官邸要裝修
【明報專訊】張建宗同陳茂波上個月分別接任政務司長同財政司長，任期只餘番4個月多啲啲，雖然7月新一屆政府佢哋有無得做官員都未知，但兩個人都計劃入住司長官邸，安排緊建築署人員裝修官邸，想任期完結之前搬入去。
陳茂波﹕方便接待訪客
政務司長官邸喺太平山頂白加道，官邸喺1951年興建，已經列為香港二級歷史建築。建築署發言人就話，「政務司長辦公室正與本署商議政務司長官邸所需的修葺工程，現時未有工程細節」，並無透露裝修費用。政務司長發言人話，官邸係古蹟建築，幾年未有整修，所以建築署要睇睇有咩地方要修整，包括有無漏水等。發言人話新司長有計劃入住官邸，𠵱家就先利用官邸接待外賓及辦官式宴會等。
財政司長官邸位喺黃竹坑壽臣山，建於1935年，係香港三級歷史建築。剛發表首份財政預算案的陳茂波，話自己「應使則使」，而距離6月31日離任只有4個月，佢就用公帑翻新官邸。陳茂波透過發言人回覆話，為便履行職務，司長不時需要接待訪客，所以遷入官邸會較為合適和方便。究竟陳茂波要花幾多錢裝修，消息人士話要等工程人員計算，所以遲少少先覆到，但就講明「唔係豪裝」。至於司長只住幾個月，係咪需要咁樣使錢，消息人士就話，𠵱家搞嘅主要係外牆髹油、換地氈等工程，就算陳茂波唔住，7月換新司長時呢啲工程都要搞。
陳茂波就透過發言人話，今次司長係「按照實際需要，把一些官邸損耗的地方加以修葺，主要包括修復建築物和地台的耗損、更換破損地氈、修復外牆油漆和更換部分破舊家具裝置」。發言人仲話，預期工程短期內完成，又話工程內容及過程符合相關嘅規定及程序。
議員﹕觀感上好有問題
對於兩個短任期司長要花錢翻新官邸，立法會帳委會副主席梁繼昌都話「不明智，觀感上好有問題！」另一帳委會成員謝偉俊就話，「如果衡工量值，一定唔值」，話無理由入住幾個月而要花錢裝修。佢話兩個司長7月後唔知有無得做，正常人都唔會搬去官邸住三四個月咁麻煩，因為到7月可能又要再搬屋。
