【明報專訊】月初特首林鄭月娥首次出席立法會答問大會，Emily見到行會新貴、安老事務委員會主席林正財(圖)特登現身撐場，但就畀傳媒影到佢不停用手提電話，好似唔係好專心咁噃。林正財噚日接受港台節目《舊日的足跡》時就解畫，話「一心幾用」係佢特色，「個腦好似有幾間房，可以同一時間各自開會」，林醫生多次強調當日真係有聽林太講嘢，事後仲send咗個message畀林太。 林醫生話，佢平時都係鍾意同一時間做幾樣嘢，「都請大家原諒我」，林醫生事後WhatsApp林太，話個「開頭開得唔錯」，但唔記得林太點覆佢，因為林太自己都成日忙到唔記得覆WhatsApp咁話。 新政府上任兩個禮拜，林醫生話行會開咗兩次會，討論氣氛唔錯，係「實務智慧型嘅行會」，但講到埋班問題，林醫生就話「希望香港市民畀多少少自由度，畀特首選自己嘅團隊」，又講明希望副局長人選方面畀林太多啲空間，唔知佢係咪講緊有過萬聯署反對教聯會副主席蔡若蓮做副教育局長，又有人聯署撐蔡若蓮呢件事呢？
|
| |
| |
;){kind=small}
;)
