徐德義落區視察滅蚊
[2017.08.12] 發表
【明報專訊】呢排新官上任嘅問責局長同副局長輪流落區，上任唔夠一個禮拜嘅副食物及衛生局長徐德義都唔例外，連日同局長陳肇始「孖咇」去醫院見前線醫護，呢兩日再去旺角同天水圍視察滅蚊。噚日佢去到旺角(左二)，當食環署人員努力清理緊後巷坑渠嘅積水同雜物，食環署旺角區環境衛生總監陳耀強(左一)就一路講解蚊患防控措施，西裝骨骨嘅徐德義聽得相當入神。
徐德義話，油尖旺區有兩宗登革熱個案，而且病人住得近，所以食環署已經加強附近嘅防蚊同滅蚊措施，包括蒐集白紋伊蚊樣本，驗吓有無登革熱病毒，搵番感染源頭。至於天水圍，前排就出現日本腦炎個案。佢又話會繼續加強公眾教育，提醒市民對由蚊隻傳播嘅疾病保持警覺，例如保持溝渠暢通同填平地面坑洞，防止積水。
更多港聞
相關新聞
