粵劇動感體驗 戴VR眼鏡演《西樓錯夢》
[2018.05.19] 發表
【明報專訊】坐定定睇粵劇就見得多，戴住VR眼鏡睇，好似化身成為粵劇角色咁體驗粵劇演出又試過未？教育大學噚日宣布成立「粵劇傳承研究中心」，兼喺商場搞咗個「戲曲動感體驗展」，展示兩款將粵劇結合科技嘅成果，包括「粵劇身段評估研究系統」同「虛擬實境粵劇體驗」。
跟名伶阮兆輝學做動作
教大由噚日開始至今個月27號一連10日，喺荃灣愉景新城搞體驗展。其中「虛擬實境粵劇體驗」，係畀參觀者戴上VR眼鏡睇粵劇，好似化身粵劇《西樓錯夢》嘅主角咁，親歷其境，用第一身視角體驗粵劇演出！
而「粵劇身段評估研究系統」收錄咗粵劇名伶阮兆輝示範嘅基本粵劇身段動作，如果想學粵劇，就可以跟住錄像做，系統會同步展示初學者個動作，之後仲會畀意見，幫有心學粵劇嘅朋友仔正確學習動作。
更多港聞
相關新聞
