鄉議局200萬賑風災 劉業強獨捐百萬
[2018.09.29] 發表
【明報專訊】超強颱風「山竹」上周襲港，市面情况惡劣，新界西貢、沙頭角同離島等地區嚴重水浸，唔少村民家園被毀，新界鄉議局上星期二嘅例會都要改期到前日，畀時間鄉紳善後。
鄉議局噚日舉行國慶酒會，主席劉業強致辭時提到，佢會領導鄉議局嘅風災善後小組，向受風災影響、要重建家園嘅村民提供實質支援。喺熱心成員幫忙之下籌集咗200萬元，包括劉業強本人亦捐咗100萬元，佢呼籲政府同社會工商各界支持鄉村災後重建。
當林鄭面大讚政府應對迅速
特首林鄭月娥都有出席酒會，劉業強當住林太面前大讚政府喺風暴來臨前，同各鄉事委員會緊密聯繫，提早預警同嚴陣佈防，將風災造成破壞同受傷人數減至最低，災後救援工作亦迅速敏捷。
佢又大讚，27鄉鄉事委員會緊守崗位防災救災，鄉事會喺風災後帶領村民自發清理路上塌樹、障礙物，體現村民群策群力、官民合作嘅良好精神，他向政府全體人員、各鄉事委員會、村代表、村民同義工致謝。
至於過去一年，劉業強認為政府有致力改善鄉郊狀况，例如為偏遠鄉村鋪設光纖網絡、推出改善碼頭計劃；不過，都有地方未完善，就好似唔少偏遠鄉村仍然缺乏路道等基建，開放沙頭角邊境禁區討論多年，到𠵱家都冇聲氣。
更多港聞
相關新聞
