【Emily】「流亡」台灣 蕭生估無命返港
[2020.10.31] 發表
【明報專訊】人稱「燒山」嘅時事評論員、KOL蕭若元，2月已移居台灣，日前接受學者沈旭暉訪問，話自己係流亡，《港區國安法》實施就被迫一定要去台灣，仲話如果香港情况無決定性改變，佢都唔會返嚟：「我估我無命返香港。」
網上論政「做多兩年要淡出」
沈旭暉話無諗過蕭生咁溫和路線嘅人要流亡，覺得好感觸。蕭生話，去年太太不斷提醒佢，要搵多一個居留地方，所以申請台灣居留證，原本係「太太移民、我依親」，1月尾台灣居留證已辦好，但去到2月頭佢諗起台灣就快封關，於是就夤夜走咗過台灣；由於疫情關係，返香港就返唔到台灣，所以留台至今，又話加上港區國安法立法，更令佢決定唔返香港。
佢話人治得人驚在條線唔知點劃，舉例前香港眾志秘書長黃之鋒仲可以「行嚟行去」，但人民力量譚得志就坐咗個幾月監。
蕭生移民台灣，打算賣咗香港嘅單位，佢話「慘到不得了」，嗰間屋佢用好多心機裝修，仲買埋樓下單位，「我諗住住過世，發夢都諗唔到要賣樓」。至於網上拍片評論時政嘅事業，蕭生話做多兩年唔會有精力做，所以「做多兩年無論如何都要淡出」。
更多港聞
【明報專訊】反修例運動觸發新工會浪潮，過往由建制派壟斷嘅勞工顧問委員會下月21日改選，被視為立法會勞工界選舉同選委會選舉嘅「試票場」。勞工處...
詳情
相關新聞
