【Emily】問責班子民記佔6 張進樂任民局政助
[2021.04.01] 發表
政府噚日公布委任民建聯成員、民政事務局研究主任張進樂(Gordon)擔任民政事務局長政治助理，今日履新。現時喺問責班子中，民建聯成員增至6人，民政事務局長徐英偉都係民記人。張進樂回覆查詢話會努力工作，協助局長、副局長處理政治聯繫工作。
早前有傳媒指控張進樂上年11月獲聘成為民政局研究主任後，至12月先簽文件辭任佢開設嘅公司「易顧問」董事，又質疑佢仍然持股。張進樂同Emily講，所有申報依足內部既定程序，有關佢嘅利益申報資料稍後會上載民政局網頁畀公眾查閱。
29歲嘅張進樂擔任研究主任時負責統籌研究項目；佢擁有中大社會科學學士學位，主修政治與行政，副修新聞與傳播；以及有城市大學專業會計與企業管治學理學碩士學位。佢亦係全國港澳研究會會員。
更多港聞
相關新聞
