【Emily】試足10年 盈盈樂樂再接再厲造B
[2021.04.09] 發表
【明報專訊】海洋公園動物團隊發現大熊貓盈盈樂樂又開始發情，公園噚日開始暫停對外開放「大熊貓之旅」，直至另行通告，畀兩隻大熊貓可以準備交配。
入發情期 海園「大熊貓之旅」停開
話說盈盈樂樂今年已經15歲，佢哋10年前開始嘗試自然交配，試足咁多年，直到舊年先首次成功，盈盈之後更出現妊娠症狀，不過可惜最後都係食詐糊。
海洋公園話，自今年3月下旬，盈盈開始變得活躍，玩多咗水，食慾下降，又會喺棲息地留下氣味標記，加上監察佢荷爾蒙水平變化，獸醫團隊確認盈盈已經進入今年嘅發情期，而樂樂亦喺佢棲息地留下氣味標記，又不時去聞盈盈嘅氣味，同典型大熊貓發情期行為脗合。Emily衷心希望佢哋今年會成功帶來大熊貓BB啦！
更多港聞
相關新聞
