【Emily】肥尹獄中變Fit尹 勸牆外「不需硬碰」
[2021.08.25] 發表
【明報專訊】民主派初選案仍有34名被告還押，至今約半年，包括民主黨尹兆堅。阿尹噚日透過facebook管理員出post話，喺獄中勤做運動同節制飲食，體重由204磅降至175磅，減咗近30磅，體重變番正常，佢講笑話以後「肥尹」呢個花名要收埋，「『Fit尹』會keep(保持)住，等到自由的一天會讓大家看到真身，哈！」
阿尹感謝大家送嚟嘅健身建議，例如健身操、太極等，話自己喺獄中會同囚友踢毽，其他時間會睇書、閱報、寫信，所以真係好忙，唔覺得悶，亦冇時間懷憂喪志，請大家放心。佢依然掛心牆外嘅事，勸大家唔需要硬碰，「留赤子之心，常懷初心，對所有香港人的奮鬥歷程記在心，做合法合理、力所能及的事，就對得起歷史、手足和自己了」。
另一被告何桂藍(Gwyneth)噚日生日，社民連吳文遠入獄前預先拍片，噚日喺facebook播出，祝賀Gwyneth生日快樂。吳文遠話難忘Gwyneth當日喺庭上親自陳辭，話唔接受任何限制言論自由嘅保釋條件，雖然咁講可能令佢無得保釋。吳又形容對方腰板挺直，「我在那刻對她佩服得五體投地」。
更多港聞
【Emily】盧煜明獲英「皇家獎章」 看齊達爾文
【明報專訊】有「無創產前檢查之父」之稱嘅中文大學醫學院副院長（研究）盧煜明（圖），獲頒英國皇家學會2021年生物學科「皇家獎章」，係獎項成立... 詳情
【明報專訊】立法會財委會喺建制派主導下打算修訂《財委會會議程序》，早前向委員諮詢第一批修訂，噚日有結果，41個委員中有39人回應，大部分支持...
詳情
相關新聞
