【Emily】籌備演藝博覽 霍啟剛中東取經
[2024.01.27] 發表
【明報專訊】藝發局主席霍啟剛近日去咗中東，為年底舉行嘅第一屆香港演藝博覽籌備，拜訪當地文化部門、了解當地文化設施、與當地藝團洽談。佢已經去到第二站阿聯酋嘅首都阿布扎比，佢話當地同第一站迪拜好唔同，迪拜偏向市場主導，阿布扎比更多係當地政府推動，同香港相似。
霍啟剛話，阿布扎比唔少文化設施、景點都有同外國合作，例如阿布扎比羅浮宮，而未來好似Guggenheim、TeamLab等國際級博物館都會落戶當地。佢又去到紐約大學阿布扎比分校，發現好多去當地表演嘅藝術家及藝團都會參與埋駐校計劃，學生認識藝術家同藝團工作外，幕後一樣學到嘢。
佢認為特區政府雖然有政策投資藝術界人才培養，但資源集中喺前線藝術家，未能令整個產業鏈嘅人才受惠，認為香港日後要認真盤點資源，例如善用位處市中心嘅香港藝術中心，或了解大灣區其他城市資源，相信可以搵到機會實現國際深度交流嘅工作。
更多港聞
相關新聞
