【Emily】太平清醮巡遊逢「立夏」 留意局部雷暴驟雨
[2025.05.05] 發表
【明報專訊】今日(5號)係佛誕假期兼「立夏」，長洲有太平清醮飄色會景巡遊及搶包山賽。飄色題材一向反映民間熱話，新興街街坊會新興街飄色隊負責人梁兆昌同Emily講，今年飄色小演員(色芯)從300多人中選出嚟，年紀身高體重均係考慮要素，唔能夠重過18公斤，同時年齡不能太細，以免唔適應。小演員一般今日上晝10點起化妝，下晝4點幾先能從飄色台下來。
會景巡遊典禮下晝1點半喺長洲中興街風水里舉行，巡遊隊伍兩點會由北帝廟遊樂場出發，途經大街小巷，約於4點45分返抵北帝廟遊樂場。
諗住去長洲嘅市民留意，天文台話日間部分時間有陽光及炎熱，市區最高氣溫約31℃，新界再高一兩度，稍後有幾陣驟雨，局部地區有雷暴。
新渡輪預計今日由中環去長洲嘅人流高峰期喺上晝10點到下晝1點，日前已公布會加班次，達到一個鐘接近6班；市民可考慮喺上晝8點至10點前搭船。
更多港聞
相關新聞
