【Emily】月底前小童搭東鐵過境免費

[2025.08.20] 發表

【明報專訊】唔少港人喺假期北上，港鐵話因應暑假出行需求，東鐵線兩個口岸的列車服務已調節班次，其中往來落馬洲最快8分鐘一班，仲推出咗小朋友免費過境優惠，大人搭指定路線亦有優惠價。

港鐵話，由即日起至8月31日，3至11歲小童每次入閘前帶小童八達通去港鐵站內非付費區嘅數碼服務站或自助換領機，就可以領取免費車程往來羅湖或落馬洲站，不過必須同日喺領取後下一程即時使用優惠，亦必須係過境車程，唔適用於機場快線同輕鐵。

另外，即日起至9月30日，用成人八達通同樂悠咭嘅乘客只要經港鐵落馬洲站過深圳，並喺同日回程時搭深圳地鐵4號線到福田口岸站，出閘前以同一張八達通拍「港鐵特惠站」，再經港鐵落馬洲站回港，可享6元車費優惠。

睇番入境處數字，今年7月總共超過870萬人次本地居民經陸路出境，而舊年同期就唔夠800萬人次。

更多港聞

【明報專訊】浸會大學噚日宣布向4人頒授榮譽大學院士，表揚佢哋對社會嘅貢獻，包括舊年巴黎殘奧雙金得主何宛淇，同埋民建聯選委界立法會議員陳永光、... 詳情

【明報專訊】為咗迎接11月嘅全運會，土拓署上個月起喺啟德承豐道公園舉辦一連4個月、超過15項「樂在承豐．動樂無限」運動主題活動，嚟緊8月31... 詳情