【Emily】歐陽萬成4語扮3角 幫國泰sell飛機餐
[2025.08.23] 發表
【明報專訊】國泰航空近日請到喺香港出世嘅荷李活棟篤笑及喜劇演員歐陽萬成(Jimmy O. Yang)拍廣告介紹飛機餐，片中Jimmy一人分飾三角，一時用廣東話扮卧底，一時又用英文飾演商務客，最後仲用上海話同普通話飾演食飛機餐食到諗起前女友嘅情深男子，十分盞鬼。
又扮卧底又做深情男
影片分3個單元，Jimmy首先飾演卧底，一開頭就學港產片《無間道》，呻做卧底3年又3年，空姐為佢送上咕嚕肉飛機餐，Jimmy話一食就諗起家嘅味道，擔心空姐已經揭穿佢嘅身分，點知最後Jimmy激動得滯，反而唔小心自爆係卧底。
畫面一轉，Jimmy再一人分飾一對商務客，一個揀法國菜飛機餐，另一個揀粵菜，兩人爭論到底米芝蓮(Michelin)好食，定公司飯堂姐姐Michelle Lin煮嘅好食。
最後一幕佢飾演情深男子，一道江蘇菜飛機餐令佢諗起前女友嘅味道，最後忍唔住問空姐飛機可唔可以掉頭，等佢返去搵女友箍煲。
更多港聞
【Emily】烏克蘭獨立日 歐盟國駐港代表齊撐
【明報專訊】俄烏戰事持續超過3年，歐盟駐港澳辦事處噚日舉行烏克蘭獨立日酒會，表達對烏克蘭嘅支持。歐盟駐港澳辦事處主任盧效偉（Harvey R... 詳情相關新聞
