【明報專訊】擁有寶馬山海景，獨立浴廁，百多二百呎四四正正，月租無番一兩萬都唔使諗吧？而樹仁大學嘅研究生就好幸福，只要畀3800元月租就可入住，專心讀書做研究。 特首上年宣布為自資院校學士學位學生提供每年3萬元資助，一眾私立院校自然受惠，以全港唯一私立大學樹仁為例，去年本科生就收到4000份申請，比前年急升六成。樹仁仲為副學士同高級文憑銜接嘅學生，提供合共2000萬元獎學金，上年有300個學生受惠，難怪有咁多學生「讀書再讀書」。 MPhil及PhD課程收生理想 樹仁副校監胡懷中噚日同Emily講，學校今個學年仲會開設MPhil同PhD課程，收生情况理想，而每個學系錄取嘅研究生不超過2人，整個研究生院亦唔會有超過20名學生。呢啲研究生除咗可以喺靚靚嘅新研究院大樓學習外，仲可以3800元超筍價入住30間單人套房嘅其中一間，部分仲有全海景。 胡懷中仲話，學校軟硬件要不斷提升，除咗研究院大樓剛剛落成外，校方仲決定再「泵水」5000萬元，翻新已經用咗超過32年嘅舊校舍，希望令同學有更加好嘅讀書環境。
|
| |
| |
;){kind=small}
