撐東北撥款 麥美娟激嬲安柱校友
[2014.06.30] 發表
【明報專訊】新界東北前期撥款喺建制派議員護航下強行通過，工聯會立法會議員麥美娟(Alice)有份支持，佢嘅母校中華傳道會安柱中學近日有校友發起網上聯署，要求校方將Alice喺榮譽校友名單中除名；截至噚日下晝5點，已有500多人響應支持。
500人網上聯署 促撤榮譽校友
負責草擬聯署信嘅安柱2012年畢業生徐凱鳴(Stacey)話，今次連埋佢在內由4個校友同1個學生會成員發起，榮譽校友名銜唔止係對校友嘅肯定，仲係為安柱嘅下一代學生樹立榜樣，但Alice過去兩年喺立法會，曾投票反對政府撤回國教科、反對用特權法查港視事件，最近又支持新界東北前期撥款，質疑Alice「是希望服務政權抑或服務市民」。
Stacey話行動唔係想人身攻擊，亦尊重佢嘅發言權，但佢嘅所作所為有違校訓「信義忠誠」，故要求校方將佢除名，以免成為師弟妹嘅壞榜樣。
麥：尊重校方任何決定
Alice回應尊重校友表達自由，又為佢嘅立法會工作影響到校方表示抱歉，如校方有任何決定，佢都會尊重；並解釋今次只係通過新界東北前期撥款，若政府無做好安置同賠償，唔排除之後會否決。Emily睇番安柱網頁，見到Alice喺2010/11年度成為榮譽校友；無線新聞總採訪主任許方輝、環保觸覺主席譚凱邦等都係榮譽校友。
更多港聞
相關新聞
