【明報專訊】立法會上個星期三晚因為法定人數不足而流會，唔少議員都對主席曾鈺成當晚夜麻麻都唔暫停會議有微言。原來頂唔順嘅唔止係議員，據聞，秘書處早前亦建議新招，將星期三嘅大會提早喺晚上8點暫停，有咩傾唔完就星期四續會。Emily八到秘書處已經初步問完議員意見，大部分議員同意早啲收工，將會落實，但要到農曆新年假後先實行。 議員：早收工仍可落區 公民黨黨魁梁家傑形容秘書處呢個建議係「一為神功、二為弟子」，佢話喎，周三早少少收工，至少議員當晚仲有啲時間可以落吓區；另一方面亦可以減少秘書處壓力。 唔講唔知，原來秘書處員工，喺晚上暫停會議後要留多兩小時先走得，第二朝續會又要提早兩小時準備，即係7點返工，所以呢個建議都可以話畀多啲時間秘書處人員休息。民建聯陳恒鑌亦話，如果早啲收工，仲夠時間去地區派傳單。 雖然呢個建議難得獲跨黨派支持，但據聞嚟緊會議都有幾個比較長嘅項目，為怕影響其他會議，立法會都要搵個適合時間先落實新計劃，所以可能要過咗農曆新年後議員先可以早啲返屋企嘞。
|
| |
| |
