【明報專訊】基督教服務處發起一年一度嘅「願望成真行動」，希望市民化身聖誕老人，捐錢幫弱勢社群達成一啲好卑微、但對佢哋嚟講意義重大嘅願望，今年就有300個小願望等住成真。 呢啲願望唔少都係為咗屋企人，例如少年家輝希望有一個熱水爐同一部洗衣機，等患有精神病同行動不便嘅媽媽唔使日日煲水冲涼同用手洗衫。來自單親家庭嘅文傑，就因為五兄弟平日分別住喺寄養家庭同院舍，聚少離多，希望趁住聖誕節同家人一齊外出食飯；仲有患抑鬱症嘅單親媽媽張女士，獨自照顧兩個仔女，但屋企對正馬路，好多塵，搞到個女成日病，佢想買部吸塵機。 等禮物嘅仲有長者同傷殘人士，82歲嘅方婆婆有手震問題，希望買固定碗同加重匙，好好哋食餐飯；殘疾少女阿媚接受緊車衣訓練，佢就想買部衣車。各位聖誕老人可以喺www.hkcs.org/support/online網上捐款，或將錢傳入匯豐銀行戶口(181-4-003883)及東亞銀行戶口(015-523-10-400062-7)，又或者喺基督教服務處網站下載指定條碼後，到7-11畀錢就得㗎喇。
|
| |
| |
;){kind=small}
