【明報專訊】立法會新界東補選2月28日(周日)舉行，早前辭職嘅公民黨前成員湯家驊(Ronny)就點名希望公民黨大律師楊岳橋出戰補選。事隔半年，已經宣布參選嘅楊岳橋日前被問到有無邀請Ronny幫手「箍票」嘅時候，話「參選前有同湯家驊打招呼，亦僅此而已」。湯家驊噚日喺facebook貼文回應，話同楊岳橋「大家互不拖欠，各奔前程」，唔知兩個係咪決裂咗呢？ 湯：無事 楊：仍尊重湯 Emily噚日特地打電話向Ronny了解吓，Ronny笑言「無事發生」，但就承認自己由去年辭職開始已經無同對方聯絡，而打呢段帖文，只係覺得自己代表嘅核心價值同公民黨相差太遠，「或者楊岳橋唔需要我……我明白嘅」。Ronny又同Emily評估選情，話新界東一直都係泛民票倉，喺多人混戰下，只要民主派團結，楊岳橋仍然有好大機會勝出。 楊岳橋回應「互不拖欠」論嘅時候就話，自己無論以往、𠵱家同將來都會一直尊重Ronny，但對方喺版權修訂條例草案同高鐵一地兩檢等嘅議題，同泛民嘅主流意見有分別，一切只能「盡在不言中」。 周浩鼎出選 fb一日4帖文 另外，民建聯副主席周浩鼎噚日亦宣布出戰新東補選，佢嘅facebook專頁一日之內就出咗4個相關帖文。上年區議會選舉嘅時候，好多民建聯候選人都停用fb宣傳，唔知周浩鼎今次迎合潮流，會唔會吸引到一班網民同年輕選民投佢一票呢？
|
| |
| |
;){kind=small}
;){kind=small}
