【明報專訊】新民黨主席葉劉淑儀被指係下屆特首參選熱門之一，葉太出席電視台節目時再被問到選特首嘅問題，佢雖然未有正面回應，但不忘暗諷特首梁振英(CY)。葉太話﹕「我一定唔會話n年都唔選，你知有人講呢啲說話，都係違心之言，我唔會講呢啲。」 澄清「CY害人」之說 葉太出席有線財經資訊台節目《政壇單打》時話，如果立法會選舉後，得到足夠民意支持，認為值得參選特首，就會考慮離開行會。同場辯論嘅工黨立法會議員何秀蘭就提番2012年，葉太為爭取提名希望參選特首，向自由黨拉票時，向周梁淑怡講過「CY會害人，我唔會害人」。葉太澄清話當年嘅意思係「好多人驚CY害人，我一定唔會，因為我喺政府嘅聲譽係 『想買樓，搵葉劉』 ，我係幫人」。 講到9月立法會選情，葉太同何秀蘭都擔心香港電視主席王維基對自己選情有影響。何秀蘭話：「我都好擔心」，因為王嘅票源「吸黃(絲)多過吸藍(絲)」；葉太就怕王會「找佢晦氣」，因為當年香港電視被否決牌照申請時，葉太係行會成員。
|
| |
| |
